ගඟක් නම් ඔබ Gangak Nam (Reserved for U.M.)

ගඟක් නම් ඔබ ගලන හිමිහිට
වනාන්තරයක හුදකලා
ගසක් වෙන්නම් ගං ඉවුරේ මා
ලොවේ දෙනෙතින් සැඟවිලා
දිනක් එනතුරු මගෙත් ඔබගෙත්
සියලු බාධක නැතිවෙලා
අසම්මතයේ පෙම්වතුන් ලෙස
ඉඳිමු මේ ලෙස සිරවෙලා

නිසංසල ලෙස ගලා යන ඔබෙ
සොඳුරු අසිරිය විඳගමී
පවන් සලමින් සෙවණ සදමින්
ඔබේ සිසිලස රැකගමී
සිහින් ස්වරයෙන් ගැයෙන ඔබෙ මුදු
ගීත නාදෙන් මත්වෙමී
සවන් සනහා නුවන් සතපා
විඩා බර ගත සනසමී

සුසුම් රැළි කඳුලැලි තුරන් වී
මුවේ හසරැලි නැගේවා
පැතුම් හදවත මෝදු වී ආ
ඒ ලෙසම ඉටු කෙරේවා
බවුන් වැඩූ සිත දැහැන් බිඳ යළි
ප්‍රේම මන්දිර තැනේවා
යුගයෙන් යුගයට දැනෙන්නට දුක්
යළිත් ඉඩ ඇති නොවේවා

රසික සූරියආරච්චි


Gangak Nam

Image by 용한 배 from Pixabay