ඔබ සිහිවෙන විට - Oba sihivena vita - තනුව, සංගීතය සහ ගායනය: දොන් මිත්‍රා සිරිමාන්න

තනුව, සංගීතය සහ ගායනය: දොන් සිරිමාන්න

ඔබ සිහිවෙන විට හදට දැනෙන සුව
පහස පෙර දිනෙක විඳලා නෑ
ඔබ සිහිවෙන විට සිතට නැගෙන රස
හැඟුම් පෙර දිනෙක දැනිලා නෑ

ඒ සුව පහසින් මා මත්වීලා
හදවත තුළ පෙම් ගීයක් ලිව්වා
ඒ රස හැඟුමෙන් මන්මත්වීලා
සැඟවුණු සිතුවිලි ගීයට පෙව්වා

ආදර ගීතය ඔබට ගයන්නට
පෙරුම් පුරාගෙන බලා සිටිනවා
පිළිතුරු ගීයක් ඔබේ හදවතේ
රුඳී තිබේ යැයි සිතට දැනෙනවා

රසික සූරියආරච්චි, 2020

---

ගීයට සවන් දෙමු.


Image by Firmbee from Pixabay

ඔබේ සිනිඳු ගෙල - Obe sinindu gela

ඔබේ සිනිඳු ගෙල සරසාලන්නට
සදා තබන්නම් රුවන් මාලයක්
හිමිදිරි උදයේ පිනි කැට අමුණා
සදා තබන්නම් රුවන් මාලයක්

සමන්පිච්ච මල් දෙකක් කඩාලා
ඔබේ දෙකන් පෙති අග පළඳන්නම්
පුංචි රෝස මල් වැලක් ගොතාලා
සුමුදු වරල ඔබෙ සරසාලන්නම්

එපා සුවඳ දිය කුංකුම අංජන
ඔබෙ වත සුන්දර මලකි ළඳේ
ඔබ මුව සිප ගෙන මම සැනසෙන්නම්
උපන් හැඟුම් පුබුදාලා හදේ

රසික සූරියආරච්චි, 2020

---

මේ පදමාලාවට තනුවක් සහ සංගීතය යොදා ගායනා කිරීමට කැමති ගායකයෙකු/ගායිකාවක හෝ එසේ සැකසීමට කැමති සංගීතඥයෙකු සිටී නම් කරුණාකර මට පණිවිඩයක් එවන්න. ස්තුතියි.
rasika.suriyaarachchi@gmail.com
Image by Adina Voicu from Pixabay

එන්න ළඳේ - Enna lande

එන්න ළඳේ මගේ හදට
සතුට සුවය තුරුළු කරන්
ඔබේ සතුටු සුසුමින් මා හදවත
වේදනා දුක් කඳුළු නිවන්නට

එන්න ළඳේ මගේ ලොවට
ඔබේ හදේ රන් පහන දල්වලා
ඔබේ හදවතින් එළිය ලබාගෙන
අඳුරු මගේ ලොව එළිය කරන්නට

එන්න ළඳේ මගේ සිතට
දහසක් සිතුවිලි පොදි කර බැඳලා
මගේ හදවතේ ඔබ ගැන ඉපදුණු
ආදරයේ පෙම් ගීය ලියන්නට

රසික සූරියආරච්චි, 2020

---

මේ පදමාලාවට තනුවක් සහ සංගීතය යොදා ගායනා කිරීමට කැමති ගායකයෙකු/ගායිකාවක හෝ එසේ සැකසීමට කැමති සංගීතඥයෙකු සිටී නම් කරුණාකර මට පණිවිඩයක් එවන්න. ස්තුතියි.
rasika.suriyaarachchi@gmail.com
Image by stuart hampton from Pixabay

මා සිත නිරතුරු - Ma sitha nirathuru (Reserved for TS)

මා සිත නිරතුරු ඔබ ගැන සිතුවා
මා හද නිරතුරු ඔබ ගැන තැවුණා
මගේ සිතට හදවතට කවර දා
සැනසිල්ලක් ඇති වේවි ද මන්දා

දුකම ය මට හිමි සැප නැත කිසිදා
ඒ මා මේ ලොව ලබා උපන් හැටි
සැනසෙන්නෙම් මා හදවත රවටා
බඹා කෙටූ ලෙස පැරදුම මට හිමි

මහ වැසි කුණාටු අකුණු නිමා වී
අහස යළිදු පැහැබර වේ දෝ
පාළු අඳුර පිරි මගේ ලෝකයේ
රුවන් පහන් තරු පායයි දෝ

රසික සූරියආරච්චි, 2020

---

Image by Arijit Chakraborty from Pixabay

පැරද පලා යන - Perada pala yana

පැරද පලා යන යුද සෙබළෙකි මා
ආදර සටනින් ජීවිත කතරේ
සුන්වූ අදිටන් හදවත ගැඹුරේ
සෙමෙන් සෙමෙන් ඉකි බිඳිනු ඇසේ

මුව ගොළු වී ඇත, සිත කැළඹී ඇත
නෙත් පියවේ මගෙ හදවත වැළපේ
පාළු අඳුරු ජීවිතයේ සුන්බුන්
වැතිරී ඇත නොනැගිටින ලෙසේ

මා සිත දුබලය ඒ බව දන්නෙමි
නැත මා දහසක් පැතුමන් දැරුවේ
පැතූ එකම පැතුම ද සුන් වූ දා
දුබල සිතින් ඉවසමි ද කෙසේ

රසික සූරියආරච්චි, 2020

---

මේ පදමාලාවට තනුවක් සහ සංගීතය යොදා ගායනා කිරීමට කැමති ගායකයෙකු/ගායිකාවක හෝ එසේ සැකසීමට කැමති සංගීතඥයෙකු සිටී නම් කරුණාකර මට පණිවිඩයක් එවන්න. ස්තුතියි.
rasika.suriyaarachchi@gmail.com
Image by Greg Montani from Pixabay